NTNU må sette av tid til medbestemmelse

Nyleg gjekk det ut ein epost frå leiaren i Forskerforbundet til medlemmer i heile NTNU med spørsmål om å stille som kandidat i valet til nye representantar i LOSAM på ulike fakultet. Eg er svært engasjert i arbeidslivstematikk og har mykje erfaring frå fagforeiningsarbeid. Derfor kunne eg godt tenke meg å stille opp, og eg tok kontakt for å høyre kva for ressurs som følgjer med vervet.

Svaret sjokkerte meg: Det følgjer null ressursar med å vere representant i LOSAM. Null. Du må altså ta på deg dette vervet i tillegg til dei andre faste oppgåvene dine.

Hun trekker seg fra verv i fagforening fordi hun går inn i NTNU-styret

For dei som ikkje veit det er LOSAM eit formelt organ for medbestemmelse på fakultetsnivå, det nest øvste medbestemmelsesorganet ved NTNU. LOSAM ved mitt eige fakultet, Fakultet for samfunns- og utdanningsvitskap (SU), har som hovudregel møter ein gong i månaden. Her drøftar arbeidsgivar og fagforeiningar svært viktige saker som angår tilsette sin arbeidskvardag; som til dømes endringar i organisasjonsstruktur, ressursar eller til og med omstilling og nedbemanning, som var eit viktig tema i 2024. 

Tillitsvalgte bekymret for de ansattes helse når NTNU bruker sparekniven

Mi fagforeining, Forskerforbundet, har 430 medlemmer på SU-fakultetet. Dette er ei stor gruppe medlemmer som ein skal representere og sikre rettigheitene til. Dette arbeidet forventar altså NTNU at ein skal gjere i tillegg til faste oppgåver, som vil seie at ein må gjere det i fritida. Til samanlikning hadde eg set av ei 20% stilling til fagforeiningsarbeid då eg var tillitsvalt for cirka 150 medlemmer ved NRK på Tyholt.

Medbestemmelse er lovpålagt etter arbeidsmiljølova, og i § 8-2 står det at tillitsvalte skal ha moglegheit til å sette seg inn i saka, føreta undersøking, vurdere saka og førebu eventuell drøfting. Det seier seg sjølv at dette ikkje er mogleg når tillitsvalte på fakultetsnivå ved NTNU blir forventa å stille opp på fritida si for å gjere denne viktige jobben.

Leiarar og administrasjon kan bruke 100 prosent av arbeidstida si til å førebu saker. Dersom NTNU verkeleg vil legge til rett for medbestemmelse slik det er skildra i lova, må tillitsvalte sjølvsagt også få sett av tid til å kunne utføre sin jobb. NTNU vil dessutan tene på dette, då det vil føre til betre avgjerder og eit betre arbeidsmiljø for alle.

Viss nokon lurar slo eg raskt ifrå meg tanken om å stille som kandidat i valet til LOSAM-representant.