Nybakt statsråd møtt med gratulasjoner på Slottsplassen
Klokka 12.15 torsdag kom Ola Borten Moe (45) ut frå statsråd hos Kongen saman med resten av Jonas Gahr Støres regjering.
Midtpunktet: Den nye forskings- og høgare utdanningsministeren Ola Borten Moe tok imot mange gratulasjonar då han stod på Slottsplassen.Foto: Martin Toft/Uniforum
Dermed overtar Senterpartipolitikaren etter Høgremannen Henrik Asheim.
Ola Borten Moe har tidlegare vore olje- og energiminister i Jens Stoltenbergs andre og siste regjering. Den gongen var også SV med i regjeringskoalisjonen, men denne gongen er det berre Senterpartiet som er med på laget til Arbeidarpartiet.
Seinare i dag klokka 15.00 skal han få nøkkelen til statsrådskontoret frå avgått forskings- og høgare utdanningsminister Henrik Asheim i lokala til Kunnskapsdepartementet. Av det som går fram av regjeringserklæringa, er truleg avgjerda om å skrota ABE-reforma det som vekkjer størst glede i universitets- og høgskulesektoren. Det slo Arbeidarpartiets nestleiar Hadja Tadik fast i ein epost til NTB tidlegare denne veka, skriv Uniforum.
– Den såkalla ABE-reforma er den mest ineffektive måten å drive effektivisering på. Når vi avbyråkratiserer, vil vi ikkje bruke reine ostehøvelkutt i heile offentleg forvaltning, slik Høgre har gjort, gjorde Hadja Tadik klart. No blir ho ny arbeids- og integreringsminister.
Talte til folket: Statsminister Jonas Gahr Støre talte til dei frammøtte på Slottsplassen etter sitt første statsråd hos Kongen som leiar av ei regjering.Foto: Martin Toft/Uniforum
